На третиот натпревар од отворениот Источно-Европски шампионат во мотокрос кој ќе се одржи викендов на патеката крај Хасково во Бугарија, МФМ ќе ја претставуваат нашите најдобри натпреварувачи, Христиан Илиоски и Гоце Томовски.
После импресивните настапи во рамките на Светскиот шампионат (Хрватска, Словенија и Словачка) во изминатиот месец, каде на последниот натпревар стана прв Македонец што освоил бод во светски шампионат во било која мотоциклистичка дисциплина, Илиоски одлучи сезоната на меѓународен план да ја продолжи со мотоцикл КТМ. Со оглед на тоа што се работи за мотоцикл од класата МХ1 тој во Хасково ќе настапи во најсилната класа рамо до рамо со Томовски.
Томовски во последните 3 сезони е во самиот врв на класата МХ1 во отворениот Источно-Европски шампионат во мотокрос. Во 2010 година ја освои вицешампионската титула, додека минатата година стигна до третото место во генералниот пласман. Моментално после 2 натпревари исто е на третото место со 63 бодови. Пред него засега се Николај Јовчев (Бугарија) со 90 бодови и Валентин Радуца (Романија) со 78 бодови.