Поканата од Мото Азуро да ја провозиме новата Yamaha X-MAX 250 ја прифативме со задоволство, новиот дизајн, агрегат како и перформансите ставени на хартија беа гарант за забавно возење.

Возењето автомобил по скопските улици во лето не може да биде нечија омилена активност. Метежот, неподносливата температура како и семафорите на секој чекор се само неколку фактори кои ќе ве предомислат од идејата да се возите на четири тркала. Возејќи мотоцикл или скутер можете многу полесно и побрзо да дојдете од една локација до друга, да ги одбегнете гужвите, да ги намалите трошоците за превоз, па дури и да помогнете во намалување на загадувањето. 

Новитетот од Јамаха кој пристигна во салонот на Мото Азуро наречен X-MAX 250 е скутер во кој ќе пронајдете се што ви е потребно за секојдневно уживање по улиците, како низ градот така и надвор од него. Под новиот стајлинг кој дефинитивно привлекува внимание се очекува агрегат кој ќе се носи со изгледот. X-MAX 250 нуди импресивни перформанси со секојдневна практичност.

Она што го нуди Јамаха X-MAX 250 е идеално за сите оние кои бараат превозно средство со кое ќе можат лесно и економично да се движат како низ градскиот метеж така и надвор од него. Х-МАХ ги дава предностите на возењето скутер, спакуван со агрегат од 250цц. Четворотактниот мотор кој има еден цилиндар е со водено ладење и развива 21кс. Иако не звучат како многу доволни се за тежината од 178кг да ја доведат до максимална брзина од 150км/ч. 

Скутерот доаѓа со целосно автоматизиран пренос, новиот „V“ каиш овозможува линеарно забрзување и пренос на силата без да осетите и најмала вибрација. Секако за удобното возење се грижи и новиот рам на скутерот кој е дизајниран имајќи ги на ум спортските возни својства. Спортските карактеристики значат и по тврдо држење, затоа и возењето на скутерот низ градските улици на моменти ве потсетува на очајната состојба на нашите патишта, амортизацијата е одлична но помалку тврда за наши услови. Затоа пак возењето надвор од градот ќе ви овозможи целосно уживање во перформансите на скутерот.

xmax5

Пневматиците на скутерот се на висина на задачата, одлично држат дури на лизгавите бели ленти, а скутерот од фабрика доаѓа со предна гума со димензија 120/70-15 и задна 140/70-14. Големите тркала овозможуваат стабилност на поголема брзина, како и навремено кочење иако моделот кој го возевме беше без ABS систем.

Инженерите во Јамаха се потрудиле околу деталита, па така забележливи се одличните алуминиумски фелни, стоп светло со ЛЕД диоди, мулти-функционална инструмент табла која покажува: дигитален брзинометар, просечна и моментална потрошувачка, изминат пат, вкупна километража итн.

Доколку сте еден од оние кои уживаат во возењата низ земјава нема да имате никаков проблем во однос на багажот. Самиот скутер доаѓа со простор под седиштето во кој можат да се складираат две целосни кациги, а доколку имате потреба од повеќе простор може да нарачате и опционален куфер.

Потрошувачката на скутерот е одлична, во оние три дена додека го тестиравме просечната потрошувачка не надмина повеќе од 3,67 литар на 100км во комбиниран режим на возење (град/отворено). Она што исто така ни остави впечаток е позицијата на седење на возачот, иако на прв поглед делува невообичаено, за кратко време повисоката позиција ви овозможува полесно управување со скутерот.

Квалитетот на изработката кај Х-МАХ е во преден план. Нема компромис со материјалите, ниту пак со методот на изработка, несомнено дека Јамаха го одржува имиџот со секој свој модел, па така и за Х-МАХ 250 фабриката дава 3 години гаранција.

Скутерот може да се погледне во салонот на Јамаха каде може да се организира и пробно возење, а се продава по цена од 4.680 евра. Повеќе информации можете да добиете во салонот на Јамаха (Мото Азуро) лоциран во центарот на Скопје зад АМСМ, или на http://www.yamaha-motor.mk/

Back To Top