Пороен дожд, пад на Валентино Роси, лошо возење на Лоренцо и прва победа во кариерата за Џек Милер ја одбележа Мото ГП трката во Асен.

Валентино Роси беше во водство во воведните кругови, но Италијанецот набрзо му го препушти лидерското место на Јони Хернандез. Колумбиецот возеше извонредна трка се до 12. круг, кога ја загуби контролата и падна. Андреа Довициозо потоа ја предводеше трката и беше вмешан во битка со Валентино Роси и Данило Петручи. Данило Петручи во еден момент се искачи и на првото место, но поради обилниот дожд трката беше прекината и како важечки беа земени позициите од претходниот круг.

По рестартот на трката, Валентино Роси наметна силно темпо, возачот на Јамаха креираше солидна предност на врвот, но очигледно малку се прецени и падна во 17. круг. Еден круг претходно падна и тогаш второпласираниот Андреа Довицозо, па нов лидер беше Марк Маркез. Но Шпанецот малку се задржа на првата позиција, Џек Милер имаше фантастично темпо и лесно го помина возачот на Хонда.

21 годишниот Австралиец потоа возеше маестрално до самиот финиш за голема сензација и прва победа во Мото ГП класата.

Но и Марк Маркез беше задоволен со ваквиот расплет на настаните со оглед на тоа дека дополнително ја зголеми предноста во генералниот пласман по падот на Валентино Роси и очајната трка на Хорке Лоренцо, кој заврши на 10. позиција.

Голема штета, имав шанса за добар резултат и освојување важни бодови за првенството. За рестартот се одлучив за помеката задна гума бидејќи таа овозможуваше подобар контакт со подлогата. Но во тој свијок влегов малку пребрзо. Направив глупава грешка. Форсирав непотребно. Имав солидна предност и немаше потреба да притискам. Жал ми е за целиот тим бидејќи можевме да победиме. Валентино Роси

Следната трка се вози на патеката Захсенринг во Германија на која ќе биде присутна и нашата екипа, очекувајте ексклузивни интервјуа и фотографии од Германија.