Продолжи доминацијата на Ducati на вториот ден од тестовите кои се оддржуваат на Red Bull Ring во Шпилберг, Австрија.

Овој пат, Андреа Јанон се најде на врвот. Италијанецот беше подобар од тимскиот колега Довициозо за речиси половина секунда.

Тест возачот Кејси Стонер, постигна трето најбрзо време, но падот кој го доживеа пред крајот на сесијата го спречи неговиот понатамошен напредок. Според Стонер, причина за падот е фактот дека вози на мазни пневматици за прв пат после четири години.

Стонер не се здоби со никакви повреди но сепак немаше доволно време за да се врати на патеката. Тој досега целото време го помина тестирајќи го GP16 без крилца, а двајцата фабрички возачи го тестираа мотоциклот со крилца иако тие ќе бидат забранети од следната сезона.

Хектор Барбера ја заокружи четворката на Ducati. Тој заостануваше речиси осум десетинки зад Јанон и на крајот се најде пред двајцата возачи на Movistar Yamaha.

Валентино Роси беше девет десетинки побавен од Јанон, но сепак постигна подобро време во споредба со вчерашниот тест. Неговиот тимски колега Хорхе Лоренцо го постигна шестото најдобро време на патеката.